姜濤、Anson Lo、Edan同Jer四位鏡仔今朝早出席活動，影大合照時，姜濤忽然腳軟暈倒喺地上，嚇親全場人，其他鏡仔同工作人員立即扶起佢，最後姜濤被扶離場，離開時更見佢反胃作嘔及面青青。其後，Anson Lo、Edan同Jer返回現場揮手道謝粉絲，在場各位鏡粉大叫加油打氣。
姜濤最近忙於拍攝電影，琴晚佢更新社交網指自己凌晨2點收工，未知是否因為欠缺足夠休息。而花姐就剛喺社交網報平安，指「姜濤今早有少許胃痛，現場環境有點焗，加上閃光燈不斷，所以有少許腳軟而跣低，現在休息中，沒有大礙。大家不用擔心，老姜答應我，呢兩日會好好休息！」希望姜濤早日康復！